hutok kan niyog

 

photo credits: naturalblaze

an hutok garu an niyog. maski pa bangaon mo wara an ki pinagkaiba: masiram pag lumbod, medyo matagas kagaton pag lukadon, asin ikudkod para mahiris an gata pag laya na.

may mga hutok na salto an pagsabot, pero kung minapasabot garu nakakasabot. para nakabasa ki saro, duwa, tolo istorya manungod sa pagsakat sa niyog bigla nagka-igkat naging mas maorag pa sa mga bo-ok. na an paghuna pag abot sa mga niyog puede ng isalyada na kopra an nasikyodan nya. makosogon pa an boot na sugoon an mga sano-sano na ibalangibog asin ihiras sa bilog na kaniyogan an diit na ampol na napurot sa lukadan.

dipisil saboton asin malibong sa payo? tunay o pinilosopo? balua daw kung kaya mo, kun dai iulok na sana nindo.

paturotaghoy sana an payt

malumlum na pagkaaga
sa enot na pagmuklat
kan mata...

sa laog kan isip
naglalayaw-layaw su kantang natoom kaitong mga panahon.

"laog ako banyo piripisi sako ----!"

ini an poon kan aldaw ko bago magbalag-balag sa kadlagan na sementado.

"tukaw ako bangko
kalay-kalay sako ----!"

Manoy Edgar

 malakaw. madalagan. malunad. malayog. marabas. arog kan dati. makahugak maghiro-hiro. arog kan dati. makupot-kupot pag harani na-

ang oras de peligro...

bawion na lang sa paagi kan pakikarawan sa ispiritu kan arak. bawion na lang sa paki-inuman sa gadan na maorag.

iyo, pakalihis ki pirang taon...

mabalik kung sain pinunan ang bagong dalan. mapasyar guiraray sa harong asin nilubngan kan saro sa nakaimpluwensya sa buhay. mabasa guiraray kan mga madiklom na kasuratan.

 

santigwar

bulong sa naanayo:
patalibongon an sensilyo sa daga
hanggang ini magtoro-tigaya
patagduan nin kandila an payo
sabay kuritan nin uring an plato

mag orasyon nin todo-todo:
dakopon an manok-gilokon ang liog-anitan ki balokag-hilapon ang laman-bosion ang pikpikon

salodon an
dugo

ibuntog an muro

 kutawon

an malipot na tubig sa baso

nem, ano an nahiling mo sa uriw na nabilog sa maating plato-

ang makaraw na ispiritu o ang dwendeng natimakan mo; an santelmong nagkakalayo o ang tawong lipod sa kanto; ang demonyo sa impyerno o ang sadiri mong pagkatawo?

#

photo credit: caallother-dot-com

guiromdom

habo ko na

 kutang

rumdomon

ang mga agi-agi 

kan 

panahon,

may mga 

nabubuhay na

guiromdom...

may makanos, may magayon

may maogma, may mamundo

mga osipon na
itinago sa 

kairarom-irarumi 

kan nakakahon na
puso

ngonian lugod 

pirit na pigkakalot

ang  pagmati na 

haloy ng

 ilinubong...

habo ko na 

kutang 

rumdumon

ang mga agi-agi 

kan 

panahon,

may mga 

bagay

 na dai na dapat 

kaipuhan na 

mabuhay giraray

alagad 

ang puso

 talagang madunong
ang isip

 talagang sutil

ang bitis 

dipisil mapungpong

mabalik na mabalik

kung sain

 inot na nagtalubo

ang ugbos kan tunay na

pagkamoot

#

pangom-om

paas na ang boses, piyong na ang mata
napipiot  na ang daghan
pigkakalambre na ang  rapandapan
wara ng kusog ang laman

dai nakakahangos, dai nakakagios
dai nakakagasod, dai ng kurukarigos

lingaw na kan  mga kahapotan
wara ng pakiaram sa kapalibotan
libong na kan mga kasimbagan
wara ng  pagmati kan sadiring kamogtakan

raot na ang isip, gadan na ang puso
luway-luway na naglalakaw ang kalag pasiring
sa madiklom na kadlagan.

#

ritrato hali ki: HubPages/Quiline

madampog na hutok

...mag-agang magmi-mekaniko, magsusulit kan mga turnilyo sa payo. wara ng katotinongan- mga hutok na maluya na ang pagsabot, mga matang nakahiling sa harayo, nagkakalayo ang boot kun nata dai kayang i-eksplikar kan isip ang pangom-om sa katotohanan.

*ritrato sinublian ki brainmagnets

siram sana

nagrararom an hinangos, nagpupungay-pungay an mata

mantang luway-luway na pighuhuru-hapros

an naghihinang-hinang na lawas...

malipot sa kamot, mainit sa halunan, manamit na bulawan

an tintasyon sa buhay, dipisil mapugulan

pirit na pigsisikwal, alagad pirmi man giraray pigbabalikan-

aah, an siram kan malipoton na beer sa pamanguihan. burp.

Angelito Agcaoili: 'Sarung Banggi'

*Fantasy Variations on Sarung Banggi by Jose Valdez.

An tunay na 'Bicol Express'

Bago pa nagdalagan sa riles ang tren kan PNR, bago pa nakikipag-umbasan ang JB Line, bago pa nagsikat si Dante Gonzalgo sa basketbolan--

Ang tunay na 'Bicol Express' mga KANDING palan!

Niritrato kan 1915

Daragang Magayon

dai kayang

pugulan

an sadiri

na dai

ta'nawon

an kagayonan mo

ika 

na

nang-eengkanto

sa mga tawo

dai kayang

halion

kan boot ko

na lingawan

an anino mo

ika 

na

nang-aagda

sa mga mortal

na arog ko

sa saimong

pagsosolo-solo

nadakop mo

an puso ko

maski mga panganuron

pirit na

nagdudulok saimo

pareho ko

sinda man

nalumay kan
warang kaarog

na gayon mo.
#

*niritrato kan 1910

nalilibong na puso

makusog an bulwak
kan
masakrot na tubig

gikan
sa hararom
na burabod nin kamunduan

ang duros na dara kan uran
dai kayang pugulan kan
sagpan
ang ultimong kudal
na nagpupugol sa pagbaha
kan nagpipiritaw-pitaw na mata

 

mga matang nakapiyong, nakatinir sa diklom

wara ki kusog na imuklat, maski pirit na pigtutuklap

kan liwanag na hali sa
aldaw na nagsisilyab

sa luwas kan sadiring harong

hararom na mga hinangos

na nagduduyan-duyan sa paros

nagpapaburukod na lagabog
sa laog
kan nag-aagrangay na daghan

lalong nagpapakulog sa
nalilibong na puso


rumdumon ang sabi kan
sarong filosofo:

kung 

ang pagtubod 

daing kusog

madaling madaog 

kan mga hinghing 

na rugok.

Sugal Kan Buhay

kinse anyos/pa sana si Jose/ hiling na sa lawas/ kaini/ ang padumanan

arog kang pirming/ pigsasabi/ kan mga gurang,/

"sobra sa bisyo, sa kampo santo ang diretso"

warang pakiaram/ sa buhay/ maghapon na/ istambay

sa kanto/ naghahanap/ naghahalat/ nangangalag-kalag

ki kamidbid/ na pwedeng/ mahagadan/

nin diit/ na ugay

mainit/ ang kurit /sa halunan/ kan alak/na inabrihan.

dukot/ ang laman/ sa tu'lang/ sa mga guramoy/na may kapot kan/ baso na ininuman

pirang boteng gin/ na ang itinumba/ pirang pitsel na tubig/ na ang nahubas

alagad/ dai pa nanggad/ nauubsan/ ang pagka-paha/ sa namit

kan ispiritong/ nagsisilyab/ sa laog/ kan kristal na/botelya

uru-aldaw/ pirmi arog kaan /ang nangyayari

garu wara ng/ kapinunduhan

arog talaga/ daa kaan/ ang sarong tawong

warang/ direksyon/ sa buhay/

mahapot kita/ hain kaini /ang mga magurang

na imbes mag tao/ nin gabay/ pipabayaan na sana

ang aki/ na mag rabay- rabay/ sa kinaban

Ang simbag kan mga nakakaaram: 

mala baga/ tuun duman sa iraya/ pwerte ang hapihap/ kan baraha sa sugalan.

Pagkamoot

dai ka sana

makigkig

sa kada pagbagsak

kan hukol

sa baybayon

romdomon mo

ang kusog kan

nagdara kaini

sa saimong

pamitisan

dai mo sana

ikatakot na iluwas

ang saimong tunay na

namamatian

arog kan pagkutok

kan tubig asin basud

sa saimong rapandapan.

litrato ni: 123rf-dot-com

Pantomina

pirmi pigbabayle sa karasalan

minsan minabotwa sa baraylehan

dakul na bersyon

ang paglayaw-layaw

may makaolok asin pormal

alagad gabos ini pig-oobserbar

sa bilog na kabikolan

Panghugas

sige

iluha mo

ang kulog

nin boot

ang bulos

kan tubig

tipunon mo

para may

panghugas

kan mga

natipon

na ati

na dara

kan

bagyo.

*litrato ni mommasaid-dot-net

simbag sa kahapotan

dai ko aram

kung nata

pirit na

pigsisikwal

kan sakuyang

mga mata

ang saimong

kagayonan

dai ko aram

kung nata dai mahali

maski anong pirit

ang saimong imahe

sa sakuyang mga

pangiturogan

dai maaraman

ang dapat na gigibuhon

dai masabutan

ang dapat na iisipon

dai ma isplikar na pormal

ang namamatian

alagad 

talagang arog talaga kaan

ta sobra ang sakong

katorpehan.

'Si Nanay, Si Tatay' bersyon ni Dame Andrea Templonuevo

*napurot sa YouTube/davetemplonuevo

'Ilong Pagkamoot' bersyon ni Dame Andrea Templonuevo

I
Ilong pagkamoot nasiring sa banwit
Dae makalawod ta daeng sakayan (2x)
Dae pag bantogon
Dae makatungtong ta daeng sagkod pa si aroronay
Bari pa si sagwan, inanod pati timon
II
O madahas na duros, layag ko pinarakit
Pinarakit mo pa su sarwal kung puti
Isay pa daw ang maherak sasako ngonian
Pati si torsido, pati si torsido
Si dago nabari.
(Repeat II)

Living Asia: Bicol